El fumo violeta- Accésit edición 2004.   El misterio de una pipa encontrada en una bodega.    Un forau desmasiau negro. Accésit edición 2005 Relato futurista ambientado en una nave espacial en el año 2080.  Ver Xordica )

Los dos hermanos-  Primer premio edición 2006. La historia de dos hermanos enmarcada en el conflicto palestino-israelí  L' home de goma. Accésit  edición 2006-  Un hombre de circo casado con una beata que muere haciendo su número. Ver Xordica

Esa pena que ahoga                    Ixa pena que afoga Primer premio de relatos Cleto Torrodellas edición 2003  ( Ver Xordica )	Una historia cruda de violencia de género  ambientada en el Aragón más profundo de principios del siglo XX.
Birli birloque que vuelva Roque     Birli birloque que torne Roque   La historia de un exilio contada desde la voz de un niño, premonitoria de la novela Lo que mai no s' olbida. Primer premio edición 2002. Ver publicaciones Consello d' a Fabla Aragonesa)	El retratista Relata en clave de humor las peripecias de un fotógrafo ambulante que se ganaba la vida por los pueblos haciendo cine y retratos de época. Accesit edición 2000. Ver publicaciones Consello d'a Fabla Aragonesa )
L' ixambre Primer premio "ex aequo" edición 2003	Este relato cuenta la historia de una locura justificada, la tragedia de una familia que vive en el medio rural y que dedica buena parte de su tiempo a las abejas y al proceso de la miel.  Lo  transcribo a continuación.

En zagueras la siña Rosalina s´estaba pasán de cabeza. Teniba de contino una basemia: buscaba una escalera, pero no le valeba cualisquiera. Necesitaba veyer una escalera que teniba en el suyo tozuelo y que feba tiempo que no trobaba per nengún lau. El siño José, de cuan en cuan, le’n enseñaba bella que atra pa veyer si se conformaba pero mai no eba la qu´ella quereba.

-¡Ixa no é!- gritaba sacudín la mano con actitú de desprecio.

Rosalina, en pocos años s’heba tirau dos veces per la misma ventana y se conoce que le pasaba como con la escalera, que tampoco no eba la adecuada. Eba cuasi un milagro que encara no s´hese matau, de seguro que si s´hese caiu sin querer ya s´hese muerto pero como lo feba con la intención de morir-se , pues no ñ’i heba manera.

Rosalina no é que fuese asinas de nacimiento , é que las circunstancias de la suya vida l´ heban feito tornar d´ixa traza. Teniba güen corazón, pero estaba ya farta de vivir, en habeba visto de tantas...

Nomás se distraeba con la faena de las colmenas y con los ixambres. En el güerto de la casa teniban un colmenar don ñ’i heba lo menos doce colmenas cubiertas per un telladé. Ella , en medio de los homes, paeceba la abella reina. Dicen que la abella reina tiene un sexto sentido y no bombolonea siempre igual. El siño José teniba prou oido como fillo de músico que eba y entendeba millor que nenguno los mensajes del zumbiu de la reina y cuan la sentiba  bomboloniar a la tardada, antes de la puesta de sol, d´una traza concreta  sabeba ya que los ixambres se’ n iban al maitino siguiente al rayar el día, no fallaba. Siempre pasaba como él diba. Rosalina tamé eba prou experta pero no afinaba tanto las prediccions como el suyo home. Ella valeba más pa preparar las colmenas: las feban con cañas y boña de vaca masada. Emboñaban ben la colmena y la tapaban con el orquillo qu´eba un tape de madera. Las abellas feban una capa fina con la boña  anda que no se i veyeba l’ exterior ni per alredol del orquillo y dimpues meteban encima la cera y , a la fín , la miel.

Pa la primavera veniban los zánganos qu´ eban bllancos y se criaban en los foraus de la miel, ixo eba el pollo que al año siguiente creaba un ixambre. Asinas se fundaban las abelletas. 

El siño José entendeba muy ben tót´l entramau de los ixambres y tamé las fundadas llocuras de la suya muller. Heban perdiu a dos fillos , el uno se´n un ninón de nomás seis años va morir entre las ruedas del tractor en el monte Camediano. Ramoné teniba pasión con ir con el suyo pare, diba que quereba ser llabrador y de cuan en cuan feba fuineta en la escuela  encara que la suya mare le fer-se morro ixe día.

A Rosalina no le paeceba güena desincusa lo de querer ser llabrador, pero ya los dixaba una miqueta per imposibles a los dos.

Aquel maitino a José le va engañar la vista, normalmente llevaba a Ramoné encima del tractor cuan llabraba pa evitar peligros pero ixe día se va quedar chugán con el cocho y entreteniu con él , chusto va correr a coger-lo en el instante qu´el suyo pare rebiraba con l’  aladro pa fer otros caballóns. Va ser visto y no visto. Aquella enorme rueda trasera  lo va chafar como si fuese de pllastilina. El siño José va estar un tiempo tan traumatizau que no despegaba la boca, eba como si se l´hesen acabau las palabras,  u a lo millor é que no le iba ben de dir-ne nenguna, Rosalina se pensaba que lo iban a tenir qu´encerrar en bel hospital d´ixes don meten a la chen que se’n va del esmo. Pero, con el paso de los días, va ir tornán a güenas.

Rosalina que siempre heba siu la valiente de la familia , aparentemente pllantaba fuerte como una roca y mai no quereba charrar del suyo fillo muerto. Siempre que le diban bella cosa d´él cambiaba deseguida de conversación. No quereba veyer la realidá ni tampoco podeba aceptar-la de nenguna traza. Astí va emprecipiar la suya particular fuida.

Asinas van pasar los meses anda qu´una tarde la van trobar sin sentido en el corral de las gallinas. Los bichos no paraban de picotiar-la y de cacaratiar anda que Manolé, qu´eba l’ atro fillo, va dentrar  y va veyer a la suya mare tendida encima de las pallas sin saber que l´heba pasau y sin sospechar que no eba un simple dismayo sino el fruto del golpe que s´heba pegau al tirar-se per la ventana que daba dende la casa al corral. Ixo lo van averiguar más abán cuan Rosalina va fer un segundo intento.

José estaba ben precupau y se sentiba culpable de tóz los mals, pero ¿qué podeba fer?. La suya muller s´encerraba a pllorar a soven en el cuarto. A él mai no le va reprochar cosa perque no quereba qu´el suyo home se tornase mudo una atra vez y empeorasen más las cosas. Manimenos, José sabeba qu´ella en las suyas entrañas le odiaba asabelo y le guardaba mucho rencor per lo que va pasar con el crío. El en el fondo se daba cuenta de qu´ella teniba razón: no debeba haber-se llevau a Ramoné al monte, si hese iu a la escuela como ella diba, Ramoné aún estaría vivo. Pero desgraciadamente, ixo ya no teniba remedio y encima l´heba matau él mismo...Los remordimientos iban fén mella en la suya salú y tamé en la suya fortaleza.

Entre tanto las colmenas seguiban el suyo curso y ya llegaba el tiempo de recoger la miel.  Concentraus en ixa faena a lo millor s´olbidaban una miqueta d´ixa pena. Lo primero que teniban que fer los homes y Rosalina eba meter-se la careta de tela metálica y trapo pa que las abelletas no les picasen per la cara. Pa partir las colmenas cogeban l’  abridor qu´eba un gancho con el que se sacaba la boña d´alrededor del orquillo . Siempre  cortaban  las colmenas per detrás, per don no saliban las abellas. Pa cortar teniban una paleta con un mango que le diban el cortador , con ixo sacaban los pans de cera qu´estaban agarraus per alredol de la colmena . Manolé esperaba con una forquilla de madera que llevaba unos alambres ataus pa que no se caese el panal de la miel.

La miel se cortaba a partir del día de Todos Santos. Si a principio de verano estaban muy llenas las colmenas cuan los homes las sospesaban , las descargaban una miqueta pa San Juan pa fer sitio, ixa miel eba la más bllanca. Si pa Todos Santos ñ´i heba bella colmena menos llena se cargaba con la miel d´atra pa rellenar-la.

Rosalina cogeba una escobeta feita con una rama de tremoncillo, la remuixaba con aigua miel y asinas atraeba a las abellas y las sacaba d´encima del panal. Otro método qu´usaban pa fer salir a las abellas eba tocar con un tocho en un proyectil gran descargau que teniban de cuan la guerra y dan-le fuerte las espantaban con la ruidera que formaban. Tamé teniban una campaneta que valeba pa fer abundante ruido. Tót  eba poco pa fer salir a las abelletas.

Cuan sacaban la colmena ñ´i heba un banquillo de patas en cruz pa sostenir-la , la boña seca que sacaban al abrir la colmena la recogeban en una sartén que Rosalina preparaba con brasa pa fer fumo pa que s´escapasen las abellas, el fumo las emborrachaba. Debán de la colmena se meteba uno con el cortador, ixo eba un fierro llargo con una paleta en la punta que desapegaba los panals de dentro de la colmena . L’ home que cortaba teniba  a un lau una cazuela y al otro la sartén. Rosalina se meteba en las manos unos calcetíns pa que no le picasen las abelletas y d´ixa traza iban fén el proceso de la miel.

Cuan conseguiban sacar el panal, lo meteban endentro d´una galleta y lo tapaban con un trapo muixau. Cuan las galletas estaban llenas, se vaciaban en cuezos de la ropa , allí se dixaban los pans. La miel más nueva eba la del año, la más escura que quedaba per las colmenas eba la del año anterior.

 Feban un descanso pa cenar y per la noche sacaban la banca qu´eba un aparato gran que teniba cuatro patas d’ un metro más o menos y  dos tiras llargas de madera per don  s´escorreba la miel . Encima d´ixas dos tiras se meteba una canasta que teniba qu´estar con güena temperatura pa que  se desfese millor la miel, pa ixo se soleba arrimar bel brasero . Asinas se dixaba toda la noche metén un barreño u cuezo gran debaixo pa que caese lo que s´escorreba del canastico.

Al día siguiente, el siño José recogeba lo que quedaba en la canasta qu´eba el cerón y lo llavaban ben con aigua ben caliente en un barreño y lo feban en bolas de cera. Al  aigua de llavar tót ixo le diban aigua miel . La siña Rosalina bulliba l’ aigua miel en un caldero  y d´allí saliba el mostillo. Las bolas de cerón se meteban en otro caldero con aigua ben caliente y se feba como un caldo y dimpues ixo se colaba en un saco y d´allí se escorreba en barreños de tierra. Una vez bullida la cera, Rosalina la colaba con un colador especial que la filtraba . La cera pura se filtraba bullín, bullín y s´escorreba en los barreños. Dimpues se retorceba ben endentro d´ una talega limpia y  la muchila que quedaba en el saco s´exprimiba con una mordaza de madera pa que s´escorrese de tót. La mordaza eban dos tablas de madera con manetas a los laus, con un alambre, con el que se chafaba el cerón.

Asinas un año par d´otro feban esta mesma faena . Manolé, l’ único fillo que les quedaba, teniba ya prou experiencia, ya emprecipiaba a entender el bomboloneo de la abella reina en las puestas de sol y sabeba fer ya tót el proceso de la recogida de la miel sin la ayuda de los suyos pares. Manolé teniba ya los dieciseis años, eba un zagal bel pllantau qu´enamoraba a las mocetas. Eba guapo, teniba los ojos azuls y el pelo moreno que se dixaba una miqueta llargo. Eba prou alto y teniba un cuerpo muy ben formau. No sé si per el contino contacto con la miel, resultaba un mocét prou dulce que las encarambelaba fácil y en feba pllorar a más d´una. Teniba un aire despistau que le feba encara más interesante, Rosalina siempre recordaba una anécdota de cuan teniba diez años. El día de Domingo de Ramos va ir con la rama d´olivera a misa y cuan va tornar pa casa se va dar cuenta de que llevaba la hostia en la pocha, s´ heba olbidau de comér-se-la. Ixo eba de los primeros años que las daban en la mano. La suya mare, cuan va veyer que sacaba la forma bendecida en la cocina con tanta naturalidá se va santiguar y le va dir que se la comese deseguida.

         -Pero ¿cómo puez fer una cosa d´ixas? ¿Qué habrá pensau el cura?- diba precupada.

        -Mamá, si no s´ha dau cuenta nenguno...

        - ¡Es un verdadero desastre, Manolo!- diba Rosalina.

         - Es que a lo millor iba pensan en atra cosa...

Siempre teniba detalles d´estos, pero a las mocetas les feban reir estos despistes.  Ara qu´heba creciu eba como un crío gran que confiaba desmasiau en las suyas fuerzas. Le paeceba que s´iba a comer el mundo, él podeba con tót. Igual daba de comer a los animals que feba las faenas del monte, lo único que no s´atreviba a coger eba el tractor. L´heba cogiu tal miedo dende la muerte del suyo hermano que no trobaba l’ instante d´ aprender a conducir-lo.

Ixo más abán- diba - cuan me saque el carnét de conducir-. Y é que Manolé va sufrir mucho con la muerte del suyo hermano y lo trobaba a faltar aún ara que ya s´entreteniba con las mocetas. Heban pasau lo menos ocho años dende aquel horrible día que teniba tan grabau en la sesera, encara sentiba los pllosos de la suya mare y percibiba l’ extraño silencio del suyo pare. Aquello mai no lo podría olbidar. Va ser tan triste pa tóz...

La suya mare le diba que teniba que ser fuerte, él estaba destinau a cuidar el patrimonio de la familia y tamé seguramente a cuidar de los suyos pares qu´estaban ya una miqueta achacosos. La verdá é que s´heban envejeciu antes con antes per la pena que teniban los dos y se miraban a Manolé como la suya esperanza. No saliban del suyo asombro al veyer-lo crecer y transformar-se en un home tan sano y fuerte. Ya l´heba espuntau el bigote y teniba cuatro pelos en la barba que encara lo feba más guapo de lo que eba de per sí.

Pero Manolé, como ya he dicho, confiaba desmasiau en las suyas fuerzas. Aquel año, dimpues de recogida la miel de las colmenas, los pares van dixar hervín el cerón en el caldero del fogaril y se van chitar a descansar una miqueta, ya las fuerzas les fallaban en zagueras. Entre tanto,  Manolé va querer adelantar faena recogén trastes, canastas y orquillos pa que los suyos pares se podesen sentir orgullosos d’ él y tamé p´ayudar-les un poco. A ultima hora va emprecipiar a rechirar el cerón del caldero. Ya paeceba qu´estaba prou cllaro, igual no eba güeno qu´hervise desmasiau – va pensar. Asinas que Mañolé va fer un intento de sacar el caldero que pesaba abundante del cremallo del fogaril. No va conseguir otra cosa que derramar un güen chorro de cera de miel per la plancheta metálica que ñ´i heba debaixo del fuego pa dixar los trastes. Se va arrimar al cuarto pa dir-le al suyo pare que aquello ya estaba en el suyo punto pero los va veyer tan tranquilos dormín que cuasi le va fer duelo despertar-los,  pa una vez que los trobaba chuntos y aparentemente felices. Asinas que va decidir fer la faena el sólo. Va coger un trapo pa no quemar-se y va probar per segunda vez a descolgar el caldero lleno de cerón derretiu del cremallo. Va agarrar l’ asa con firmeza y achocan-se una miqueta, lo va llevantar. Ya faltaba nomás  baixar-lo al suelo poco a poco. Va dar un paso enta trás pero no s´acordaba de la miel derramada que ñ´i heba per el suelo con lo qu´el peu  va relliscar perdén l’ equilibrio y caén desamparau enta atrás con el caldero de cerón hervín que se va tirar tót per encima. Manolé cuasi no va tenir tiempo  más que de dar un chemeco gran de dolor perque va perder el conocimiento al instante ya que aquella materia tan apegallosa le va empllingar de tal traza el suyo cuerpo que le va abrasar per completo. Va durar unos días muy grave en l’ hospital anda que va seguir el mismo camino qu´el suyo hermano.

Dende entonces Rosalina y José van dentrar en una fase de mutismo total. Eba como un vivir per vivir perque no quedaba otro remedio. Entonces va ser cuan ella va emprecipiar a esbaruquiar buscán ixa escalera que mai no trobaba. José, desorientau, no feba otra cosa que enseñar-le escaleras sin descanso pa veyer si per lo menos podeba conformar a la suya muller encara que fuese a deshora. Y es que la seña Rosalina s’ estaba pasán de cabeza.
       Al siño José, cuan charraba, le saliba una voceta apuquida que cuasi no se sentiba, la chen diba que se le estaban atrofián las cuerdas bocals a puro de no dar-les uso.

En ixe tiempo, Rosalina va probar a tirar-se una atra vez per la mesma ventana  y las gallinas van tornar a picotiar-la abundante anda qu´el suyo home la va trobar esturdida, con un brazo rompiu y una buena nafra en la cabeza.

Entonces, cuan ya la cosa cllamaba al cielo, va acudir Mercedes, la hermana de Rosalina, a ayudar-les . Mercedes eba más preta qu´una liga, eba tacaña tanto en lo material como en lo espiritual, tót lo contrario que Rosalina . Una güena prueba de ixo eba que dimpues de tót lo que l´heba pasau a la suya hermana con los fillos, no va ir en la suya ayuda anda que no se podeba valer pa cosa. Va estar un tiempo fén llimpiezas y acontracián-la, pero per fín va decidir llevárse-la a la suya casa qu´en el fondo eba la casa de tóz pues allí heban naciu las dos hermanas . José, en principio, no  quereba mover-se perque no se feba güaire con la suya cuñada per ixe carácter que teniba. El siempre diba que Mercedes eba tan preta que preparaba las tortillas con medio güego  y teniba presente un dato importante en la cuestión alimentaria: lo menos feba dieciocho años que Mercedes no compraba pan perque dimpues d´un día que va ir a la panadería a pedir pan pa´l cocho y le’ n van dar gratis del día d´antes, va decidir comer-ne d´íxe mesmo qu´ella diba qu´estaba más rebllandeciu.  Bernabé, qu´eba el suyo home, iba siempre amén-amén con ella, a la fín él va llegar a ixa casa con lo puesto, todas las pertenecias que teniba las traeba en un calcetín. José recordaba el equipaje del cuñau a soven: una estrella de cartón con filos de cinco colors, un par d´agullas, una petaca , tres botóns y vente duros. Asinas que a él tó le veniba ben y se comeba el pan antiguo tan ricamente.

Encara con ixo, José se va convencer de que ir allí en ixe instante eba lo millor pa los dos perque él se sentiba ya un poco impotente con la muller y con el mundo.

Pa Rosalina, en el estau en qu´estaba, tornar a aquella casa va ser como retroceder el reloj de la propia historia. Le veniba a la boca anda el sabor d´aquellas tarnas de tomate del güerto que cuasi no teniban simiente y de las algarchofas fritas que teniba medio olbidadas . Ya la primera noche que van pasar allí van tenir una agradable sorpresa. Cuan Rosalina iba a subir al piso d´alto con José cara enta la alcoba pa chitar-se  de repente se le va illuminar la cara. Al pisar el primer peldaño, va escllamar:

-¡Esta é la escalera!,¡la escalera!¡ esta é!

José estaba tan contento como ella, per fín Rosalina heba teniu una alegría. Va subir la escalera a toda prisa y  va dirigir los tientos al almario que ñ´heba enta la drecha, endentro d´un cajón va trobar una cajeta chiquerrina don guardaba unas cartas. José no saliba del suyo asombro, Rosalina teniba allí cartas de amor d´un zagal que la heba queriu de chobeneta. La emoción l´embargaba. Se va meter a leer-las una a una y aquellas cartas van tornar al suyo rostro un aire de chubentú que feba muchos años qu´heba perdiu. José, anque sabeba qu´aquel estau eba algo ficticio, estaba alegre perque la veyeba felíz a ella. Amás la realidá no se sabe muy bén qué cosa é, mos parece que lo real é lo que mos contan u lo que veyén pero ni lo uno ni lo otro está brenca cllaro. Lo que mos contan siempre tiene matices de mentira, seguntes quí lo conta , y no lo digo nomás per la televisión u per el diario  que tamé tergiversa abundante la realidá sino per lo que mos contan los demás. Y lo que veyén tamé e prou relativo perque influye prou l’ estau d’ ánimo, un árbol te puede parecer un día robusto  y fuerte y dar-te sensación de seguridá y protección, y un atro día lo puéz veyer, sén el mismo árbol,  como algo amenazante y peligroso con las suyas ramas.

Rosalina estaba fuera de la realidá actual pero estaba vivín en otra realidá que tamé le perteneceba anque s´hese quedau transnochada en el tiempo y formase parte del paraiso de la suya infancia y chuventú. Cada día rescataba del fondo de la memoria espacios de la casa don va nacer: además de la antigua escalera y de las alcobas don dormiban, tamé va trobar el masador don feban el pan y endon estaba el torno y l’ arca de masar,  la lluneta...La lluneta eba como una terraza que ñ´i heba en la parte d´atrás de la casa don estaban las macetas y los gatos. Allí chugaba Rosalina de menuda con las moñas y les feba comidas chafán fllórs y yerbas mezclladas con tierrra en una cazoleta. Dimpues les feba un forau a las moñas en la boca y las empapuchaba con un tocho. 

Ara Rosalina se sentaba en un sillón de mimbre que ñ´i heba en la lluneta a sentir bomboloniar a las abellas, tanto a las de verdá que reboloteaban per los geranios y las lilas, como a las imaginarias que zumbaban en la suya cabeza qu´emprecipiaba a parecer un ixambre de contino, y cogeba una moña d´aquellas que l´alcanzaban los sobrinos y la abrazaba contra el suyo pecho como si fuese la moña de la suya infancia. El siño José se sentaba con ella y le daba la razón en tót perque sabeba qu´ en el fondo la teniba anque tamé pensaba que la razón le’ n tendría qu´haber dau antes, en atro tiempo, cuan ella le diba que Ramoné ise a la escuela y, sin pensar, él  lo va mandar mucho más lejos y tan alto que ya no lo va veyer nunca más. A José se le escapaban a soven las glárimas, diba que teniba los ojos pllorosos del sol pa disimular, la suya cuñada le meteba unas lentes escuras que él agradeceba perque asinas podeba pllorar más tranquilo. D´ixa traza pasaban muchas tardes de primavera sentaus en la lluneta tomán el sol, y de cuan en cuan subiban per las escaleras que conduciban al güerto y Rosalina cogeba violetas, kikirikís, ababols, panéz y flloretas d´ixas que llaman sangre de Cristo  y qu´ella empapuchaba a las moñas cuan eba cría.

Un día , a la tardada , antes de la puesta de sol, el siño José va sentir la peculiar y dulce musiqueta que feba la abella reina cuan los ixambres iban a arrancar el vuelo y se’ n iban a atros puestos. Mercedes encara conservaba las antiguas colmenas .

Tal como José siempre predeciba, al maitino siguiente, a primera hora se va sentir un ruido tremendo d´abelletas volán . El siño José va brincar de la cama y va subir la persiana del cuarto pa veyer-las per el cielo. Un par de boiras negras subiban cara ent´alto y paeceba que s´acercaban al suyo ventanal pa despedir-se. Emocionau, se va chirar enta la cama pa dir-le-ne a Rosalina pero ella permaneceba quieta y perfumada al lau d´un ramé de violetas que teniba en un vaso de la mesilla y no le contestaba ni feba mención de cosa. Pálida y fría , con la moña abrazada y una leve sonrisa en la cara, Rosalina heba marchau a un atro puesto, heba volau tan lejos como van volar los suyos fillos a edá tan temprana. Se’ n heba iu , como la abella reina, con los del  suyo propio ixambre.

                                                                     VII Premio Literario en Aragonés  "   Billa de  Sietemo"

                                                                                                                                  echazal@hotmail.com